Canda as flores, na primavera tamén agroman as letras. Ben mesturadas forman poemas e contos marabillosos como os que escribiu a protagonista do Día das Letras Galegas 2021. Pero se hai unha letra que nos abre as portas ao seu universo esa é o X, tan grande como o que dá inicio ao seu nome: Xela.
Xela Arias ten un lugar especial na historia das nosas letras polo seu traballo de editora e tradutora, pero, sobre todo, por ser unha extraordinaria poeta. A poesía é un oficio con moita maxia: os poemas son quen de contar o mundo coa palabra e, o que é máis abraiante, incluso poden crear outros universos.
Achegámonos á Xela Arias máis comprometida e inconformista, a que tomou a palabra para defender a paz, o medio ambiente ou a igualdade entre mulleres e homes.
Ademais de ser unha extraordinaria poeta e unha referencia na nosa literatura, Xela Arias tamén axudou a que as obras de moitas outras persoas chegasen ás librarías.
Estímase que no noso planeta existen máis de sete mil idiomas diferentes. Imaxinades sabelos todos? Sería unha misión imposible. Para iso necesitamos das tradutoras e dos tradutores, esas persoas que son quen de expresar nun idioma distinto algo dito ou escrito.
