Na televisión, na radio, na rúa, na escola... este 2020 imos escoitar falar moito de Ricardo Carballo Calero, autor ao que a Real Academia Galega dedica o Día das Letras Galegas. Pescudaremos que hai detrás deste nome.
Ricardo Carballo Calero nunca se converteu en mariño, como imaxinara de mozo, pero embarcouse noutro proxecto titánico: investigar a vida e obra de centos de homes e mulleres que escribiron libros en galego.
Ricardo Carballo Calero foi un lector apaixonado dende neno. A súa familia tiña interese pola cultura e na biblioteca da casa había libros de coñecidos escritores estranxeiros (Alexandre Dumas, Vítor Hugo...) e tamén de grandes figuras da poesía galega, coma Manuel Curros Enríquez ou Rosalía de Castro, unha autora que despois sería determinante na súa traxectoria como escritor e investigador da literatura.
Ricardo Carballo Calero fixo historia ao se converter en 1972 en catedrático universitario de Lingüística e Literatura Galega. Por primeira vez o noso idioma e as nosas letras entraban pola porta grande da universidade.
Ata finais do século XIV, as xentes dunha e doutra beira do río Miño compartían a mesma lingua: o galego-portugués. O paso do tempo e acontecementos históricos moi importantes, como a independencia de Portugal, favoreceron que esa lingua orixinal se dividise en dous idiomas distintos.
